O’ Viecchiariello

Nu’ viecchiariello passa pe’ stu vico,
purtanno ‘ncuollo ‘o piso d’o scartiello e,
pe’ se da’ coraggio,
s’appuoia c’a mano tremante
a ‘o bastunciello,
c’a malapena ‘o regge pe’ pietà.
Quant’anne so’ passate
‘a quann’è nato:
ma proprio tanti!
M’ha strenno ‘o core
Quanno l’aggio visto!
Comme cammenava:
‘o respiro affannoso,
l’uocchie russe e stanche!
Forse tenea ‘a voglia ‘e se fermà,
pusà ‘o bastone,
‘a busta co’ panino,
‘o piso c’a natura ‘nce aveva rialato
E fa’ nu suonno senza ‘e se scetà.
Int’o vico
È mancato ‘o viecchiariello
E forse mo’ cammina cchiu spedito,
senza tremà,
senz’affannà,
pe’ chella strada ca’ nun fernesce maie.
E ‘nce va ‘ncontro pure quacc’amico,
ca sta pur’isso nell’Eternità!

   Franca Grella